طريقة التحضير
شهيوات من الدار_مع _سناء و حليمة ام شهد من البيضاء
ميني باگيط بالحليب
* المكونات و الطريقة :
كناخدو كاس كبير ديال الحليب دافيء تقريبا 250 مل نوضعوه في الإناء الي غادي نخدمو فيه ، نضيف عليه نص كاس سكر ، معلقة كبيرة من خميرة الخبز ، زوج معالق دقيق، نخلطهم مزيان و نخليهم يخمرو 10 دقاءق. من بعد مايتفاعلو نضيف ليهم نصف كأس زيت و قشور ليمونة محكوكة ، كيس ڤاني، و نخلطهم ، نضيف الدقيق شوية بشوية حتى يتجمع الخليط بلا مندلكوه ، غير يتجمع لينا ويكون شوية خفيف كايتلسق في اليد، نغطيوه و نخليهم يخمر ساعة ، من بعد ناخد شوية الزيت و ندهن يدي ، ناخد كورة صغيرة نسرحها شوية ونلويها على شكل باگيط( تكون شوية خفيفة متزيروش و مانفوتوش زوج دورات ) ، نوضعهم في لاطة و نغطيهم ، نخليهم يخمرو مزيان.
من بعد نشرطهم و ندهنهم بخليط (الحليب مع القهوة سريعة الذوبان و شوية العسل) ، نرشهم بالزنجلان الاسود و اللوز الكونكاسي و الزنجلان الابيض.
يدخلو الفرن مسخن من قبل على درجة حرارة 200 ، غير ندخلهم ننقص الحرارة ل170 من لتحت فقط، حتى يطيبو و نطلعهم الفوق يتحمرو .
ملي نخرجهم نغطيهم مزيان ، وحتى يدفاو و ندههم بالنباج.
بالصحة والراحة.
