- ●نحتاج حوتة كبيرة من وزن 2,5حتى 3 كيلو(القرب،أو الباجو غويال...)تكون محلولة غير شوية من البطن باش متحلش لينا في الطياب.
- ●المهم تكون مغسولة مزيان وناشفة مزيان من الماء.
- ●3 الفريعات كبار ثومة محكوكة، عصير حامضة، لب نصف حامضة كبيرة مطحون، ملعقة كبيرة مركز الطماطم، نصف ملعقة كبيرة هريسة، أربع ملاعق كبيرة معدنوس مقطع.
- ●ملعقة كبيرة تحميرة، ملعقة صغيرة ابزار، ملعقة صغيرة ملح و ملعقة صغيرة كامون.
- ●كأس مخلط ما بين زيت بلدية ورومية(تنغلبوا الزيت البلدية).
- ●نخلطو الشرمولة، نفلحو الحوتة شوية بالسكين، وندخلو ليها الشرمولة.
- ●ناخذو لاطة الفرن مفرشة بورق الألومنيوم، نديرو فوقوا ورق الطبخ، نزلو شوية الشرمولة، دوائر الحامض ، عريشات الكرافس، نزلو الحوتة، نستفوا فوقها دوائر حبة مطيشة وداوئر حامضة.
- ●نلفوها مزيان في ورق الطبخ، ونسدو بورق الألومنيوم، ندخلوها تطيب في الفرن يكون سخون، العافية مشعولة من فوق وتحث.
- ●تقريبا 40 دقيقة تتكون واجدة(خاصنا منطيبوش الحوت بزاف باش ميجيش ناشف)
- ●نعريو على الحوتة،ونطيبوها شوية من الفوق.
- ●* نحضرو صوص طوماط مرافقة لطبق الحوت، ممكن تعتمدوها في جميع وصفات الحوت اللي تنطيبوه في الفران أو الطاجين(كويرات السردين)تتجي لذيذة بزاف.
- ●في كوكوط تنديرو حبات الطماطم(تقريبا 5 حبات)، تنقطعوهم مربعات،نزيدو عليهم فلفلة حمراء مقطعة على شكل طولي، ضريس الثومة محكوك، شوية الحامض مصير مقطع بقشورو، معدنوس مقطع، عريشات الكرافس، نصف كاس مخلط ما بين زيت بلدية ورومية، ملعقة كبيرة مركزالطماطم، فلفلة صغيرة حارة، شوية الهريسة، ملح، إبزار، شوية الكامون، شوية من الزعفران شعرة.
- ●تنسدو على الكوكوط وتنديرو الصفارة، ونخليوها طيب على نار مهيلة، حتى توقف في الزويتة ديالها.
- ●تناخذو زوج بطاطات نقطعوهم على شكل طولي، ثلاث حبات من الكورجيت مقطعين على شكل طولي، نضيفو عليهم شوية المعدنوس مقطع، ملح، ابزار، شوية الكامون، شوية الهريسة، ملعقة صغيرة مركز الطماطم، ملعقة صغيرة عطرية الحوت الحمراء، شوية الزعتر محكوك، ورقة سيدنا موسى،ونضيفو شوية الكروفيت ، شوية الكلمار(باش تجينا الخضيرة منسمة)،
- ●نخلطو كلشي، نضيفو من الفوق زويتة بلدية، نغطيو صينية الخضر بورق الطبخ وورق الألومنيوم، ونطيبوهم في الفرن.
- ●ناخذو رابعة القمح نسلقوه مع شوية الملح، نسقطروه مزيان، نديروه في مقيلة كبيرة ، نضيفو عليه كمية من المرق اللي طلق لينا الحوت مع كمية من صلصة الطماطم اللي طيبناها في الكوكوط.
- ●نديروه فوق البوطة يتقلى شوية باش يشرب لينا بنة الحوت، نصححو الذوق(نضيفوا الملح،الهريسة...)
- ●* تناخذو رابعة الزيتون مسلالة، نغسلوه ونزولوا ليه العظم، نديروه في كسرونة ونضيفوا عليه شوية من مرق الحوتة، ونديروه فوق البوطة يتقلى شوية باش يجي منسم مع اضافة الهريسة والزيت البلدية.
- ●وأخيرا تنقدموا طبق الحوتة، مع صلصة الطماطم في الجانب، الخضر المشرملة، القمح المشرمل و الزيتون.
- ●و بالصحة والراحة.
الطبخ
حوتة كبيرة في الفرن بالشرمولة المغربية بطريقة أسماء فوود
231
ذ. سناء العناني
الإثنين
- الخميس
10:00 - 12:30
ذ. عماد ميزاب
الإثنين
- الخميس
