وصفات المستمعات للجبن و الفرماج
اليوم في حديث و مغزل مع سناء الزعيم قدمو لينا المستمعات مجموعة من الشهيوات ديال الجبن و الفرماج و هادي البعض منها:
* ابتسام من مراكش : الجبن منسم بالحبق و الأزير // نصف لتر من اللبن نديروه في بلاستيك غذائي و نزيدو عليه أزير و الحبق و شوية الملح و نديروه في الثلاجة حتى يولي قاسح و نديروه في زيف حياتي ، والا بغينا نقدموه للفطور نخرجوه من المبرد في الليل و نخليوه يستقطر ثم نقدموه بالصحة و الراحة.
* كنزة من بركان : فرماج ديال الدار // 2 كيسان من الحليب غبرة ، كأس حليب ، كاس الزيت ، 2معالق من الحامض معصر ، 2 فرماجات مربعين ، ملح ، نخلطو الكل في الخلاط مزيان حتى يعقد ثم نوضعوه في اناء ونخليوه ثم نقدموه بالصحة و الراحة.
هدى من الصويرة : الجبن بالزعتر // 1 لتر من الحليب ، 2 حامضات ، 2 معالق كبار من القشدة الطرية ، ملح ، ابزار ، معلقة كبيرة من الزعتر ، ضرس ديال الثومة ، نغليو الحليب ونخليوه يبرد ثم نضيفو ليه عصير الحامض و نديروه في زيف حياتي و نخليوه يقطر و نقدموه بالصحة و الراحة.
* فاطمة الزهراء من العيون : فرماج مصاوب في الدار // 2 كيسان من الحليب سائل معقم ، 2 كيسان حليب غبرة ، 2 فروماجات حمرين ، 1 خمارة حمراء ، ملح ، نطحنو الكل مزيان و نديروه في اناء و نخليوه اياة كاملة حتى يتجمع ونقدموه .
يسرا من الحسيمة : الجبن بالياغورت// 1 لتر حليب ، 1 ياغورت ، ربع لتر حامض معصر ، زعتر و ملح ، في كاسرونة نديروها في وسط كاسرونة مليئة بالماء "حمام مريم" و نخليوه يغلي حتى يبدا يتجمع لينا ثم نقدموه بالصحة و الراحة.
حديث و مغزل مع سناء الزعيم برنامج كل امرأة مغربية من الاثنين للخميس ومن 9 لل 10 ديال الصباح مباشرة على أصوات
