شهيوات المستمعات
اليوم في حديث ومغزل مع سناء الزعيم قدمو لينا المستمعات كيف العادة مجموعة من الشهيوات المختلفة و هذه البعض منها :
فتيحة من فاس : ملاوي على شكل بليغات// زلافة من الدقيق الحرش ، 2 زلايف ديال الدقيق الرطب و الملح و الماء الدافئ ، نجمعو الكل و نعملو بها كويرات صغار مثل المشمش.
الحشوة :مطيشة محكوكة و فلفلة حمراء و خضراء و ملح و ابزار ، الكون ، زيت الزيتون ، زيتون أسود و الجبن محكوك وعلبة من الشعرية الصينية .
من بعد ماتورقي العجين مزيان تحطي الحشوة في الوسك و تشدي القنات أو الأطراف بزيتونة كحلا على شكل بليغات و تدخليهم للفرن .
* مليكة من البيضاء : دجاج في المقلاة //صدورة الدجاج مقطعين على شكل شرائح ، ملح ، ابزار ، سكينجبير ، ثومة محكوكة ، عود الخرقوم عصير حامضة و ترقديهم ليلة كاملة، وفي الغذ تطيبيهم في مقلاة .
- كيكة : كأس سنيدة ، كأس زيت ، كأس ماء ، في كاسرونة تزيدي ليهم 2 معالق كاوكاو و تشعلي عليهم حتى يجيبو الغلية ، وفاش يبرد الخليط تطربي 4 البيضات ، 3 الخمارات ، 2 كيسان فرص و تطربي الخليط و تسكبيه في مول و تدخليه للفرن حتى تطيب و تسقيها بخليط 1 كأس حليب و 25 قطعة من الشكلاط حتى يذوب في حمام مريم و عاد تضيفي الحليب ثم تزيني بالشعرية ديال الشكلاط.
*بشرى من أصيلا : عصير المانجا و البرتقال //1 مانجا ، نصف كيلو برتقال ، 5 من أوراق النعناع و السكر حسب الذوق و كأس ونصف من الماء ، تقطعي المانجا ثم تقطعي البرتقال بلا قشرة و تخليهم يبردو في المجمد ثم تطحنيهم مع المقومات الأخرى .
*أمينة من سوق السبت : البغرير // زلافة من السميدة و معلقة من من الخميرة ، 1بيضة و الملح ثم تخلطي و تخلي الخليط يرتاح ثم تطربي و زلافة و نصف من الماء ثم تبداي تطيبيه .
حديث ومغزل مع سناء الزعيم برنامج كل امرأة مغربية من الاثنين الى الخميس ابتداء من 11 صباحا.
