طريقة التحضير:

• 1

  أول حاجة كنوجدو الشرمولة لي فيها الربيع، الثوم، صلصة الصوجا و التوابل الأخرى ، ثاني حاجة نقيو القمرون و نخلوه جانبا من بعد ناخذ سيبيا و الكلمار نقطعهم على شكل دوائر نزيد عليهم 2 معالق من الشرمولة نبقاو نشحرو حتى يطيب على نار مرتفعة ثم ناخد باقي الحوت نضيفو ليه 3 معالق ديال شرمولة و نزيدو عيلهم 3 ورقات من سيدنا موسى ونصف حامضة وندخلوهوم الفران،ندوزو الشعرية في كاسرولة كنديرو 3 كيسان ديال الماء و القشور القمرون ملي يغلى الماء مزيان نصبوه على الشعرية ، من بعد كناخدو الفطر الأسود كنغسلوه مزيان 5 المرات و نخليوه يتسقطر، و كنديرو حتى الفطر الأبيض يتسقطر، كناخدو مقلة كبيرة كنديرو البورو مشلظ كضيفو معاه 2 معالق ديال زيت و معلقة الزبدة ملي يتشحر كنضيفو عليه الفطر بانواعو بجوج ونضيفو عليه ما تبقى من الشرمولة ملي يتشحرو كنضيفو عليهم الشعرية مقطعة و زيتون مقطع، من بعد كنقيو الحوت لي كيكون طاب و خرجناه من الفران و نحاولو نقيوه بدقة باش ميكونش فيه الشوك، ناخدو نصف كمية الحوت نضيفوها على الشعرية نخلطوهم مزيان او ندوزو نطويو البسطيلة ديالنا.
• 2

  ناخدو لاطة، ندهنوها بزيت لي خلطناها مع القليل من الصوجا و ناخدو زلافة نديرو فيها بيضة مع القليل من الصوجا و السودانية ، ندهنو ورقة البسطيلة بزيت و نحطو الورقة على ختها كنحطو الخليط ديال الشعرية لي ضفنا معاه نصف ديال الحوت، كنحك عليها 100غرام ديال الفرماج الأحمر، و من بعد كنضيف الباقي ديال الحوت مع القمرون لي خليناه على جنب و كنبدا نسد البسطيلة و في نفس الوقت كنلسقها بالبيضة لي وجدناها قبل مع الصوجا و السودانية، ملي كنسدوها مزيان كنتقبوها بالعود وندخلوها طيب لمدة ساعة و ربع و كنقدموها بالصحة و الراحة.
• 3

  التزين حسب الذوق.